كيف-علمت-طفلي-استخدام-الحمام-في-أسبوع

تجربتي بتعليم الحمام لطفلي خلال أسبوع (قبل السنتين)

السلام عليكم ورحمه الله

اليوم حابة أنقل لكم تجربتي في تعليم الحمّام لولدي أنس، عمره سنة و11 شهر، وكم معلومة حابة أذكرها.

بدايةً كنت لمن أقول لأحد نفسي يتخلص من الحفاظة عالسنتين أو قبل السنتين، كلهم حرفيًا بيقولوا: “أوه عاد الولد كمان مطوّل أكتر.. مو أقل من 3 سنوات” 😅😒

أنا بقولكم 😎: (قفلوا أذنكم ولا تسمعوا لأحد 🙉).

مافيه إلا ماما وحماتي الله يسعدهم هما اللي يشجعوني، وحماتي كمان كم مرة تحكّيني عن إنه كل عيالها عالسنتين يتخلصوا منها.

وبما إننا في حالة حجر وعزل قررت أجرّب، زبطت زبطت.. ما زبطت مو مشكلة.

طبعا هو يعرف المسمّيات، (أوشو – كاكا) وإنتوا بكرامة.

اليوم الأول:

سبته كم ساعة بدون حفاظة بالصدفة، ما كنت مخططة لأنها خلصت، وأقوله: أنس أوشو كاكا وين؟ في الحمام.

ورسلت زوجي يجيب أقل كمية، ووقتها اللي قررت أعلّمه، رجعت لبّسته هيا وقلت بكره حأبدأ التجربة.

واليوم اللي بعده خلاص فكّيت الحفاظة وقلت له: أنس حبيبي أوشو وكاكا وين؟ في الحمام“.

طبعًا أول يوم كلّه برا، مافي شي في الحمام 🤣!

وبعد ما يسويها يجري لعندي ويطالع بنظرات استغراب 🤨، إنه قاعد يسوّي وبيخرج عالأرض 😳!

وأرجع أكرّر عليه نفس الكلام، وأوديه الحمام أجلّسه على الكرسي، وأنظّف له وأقوله: ماما أوشو وكاكا في الحمام طيب.. لو تبا الحمام قولي.

أول يوم 6 مرات كلها برا الحمام 😅، ما أخفيكم إنه اليوم الأول كنت تكّة متوترة وبأهدي نفسي بنفسي.

لمن نام قعدت أفكّر هل أكمّل ولا لا؟ وعرفت إنه طبيعي حيكون كدا لأنه اتغير عليه (منطقة راحته) شي هو متعود عليه من الولادة!

نفسه نفس الرضاعة نفس كل شي، وقلت بعد أسبوع أقرر .

اليوم الثاني:

صار يعرف الإحساس ويقولي “أمّام” = حمّام بلغتنا 😅، ولمن نروح الحمام وأجلّسه عالكرسي ما يسوّي شي 😥 (أتوقع السبب هو الخوف)، بس يسوّيها برا بعد ما أنزله، ومرتين بس سواها في الحمام.

اليوم الثالث:

كان أفضل يوم  من ناحية تحكّمه، يسوي شويا برا وبعدها يستوعب ويقول: “أمّام أمّام” ونجري عالحمام 🏃🏼‍♀️ (لمن بدأت أعلّمه ولدي ما كان يعرف يقول حمام لكن مع التكرار إتعلمها).

بس أحب أقولكم إنه كان خايف يسوي نمبر 2 في الحمام وما رضي يسويها يومين كاملة! 🙃

مع إنه يقول في وقتها حمام ونروح بس ما تخرج، وهنا بسبب العامل النفسي أكيد.

اليوم الرابع:

كل النمبر 1 في الحمام، وخلاص بكدا أتقن المهارة الحمد لله، الأيام اللي بعدها كلها ولا غلطة ما شاء الله .

خلصنا من موضوع (نمبر 1 💦) وموضوع التحكم بالعضلة وإنه عرف الإحساس قبل لا يسويها ويصير يطلب الحمام 👍🏻.

بس حنجي لموضوع (نمبر 2 💩) وضعها زي ما هيا والمشكلة يعمل غازات وريحتها 😷 بسبب إنه مو قاعد يطلّعها، وما أخفيكم إني كنت مرة شايلة هم 😢.

اليوم الخامس:

الحمد لله عمل نمبر 2 بس برا الحمام طبعًا 😅، ولمن سوّاها انصدم 😳! فصار يجري عالحمام ويقول: “أمّام أمّام” ووراه صف طويييل من الأثر 😂🤦🏻‍♀️.

بس للأمانة ما زعلت، إلا انبسطت إنه الحمد لله فكّت بعد كم يوم وأخيرًا.

ولمن حطيته عالكرسي ما رضي يكمّلها، وجلست أحكيه عالنونو اللي فالأغنية (حتعرفوا موضوعها تحت)، وأمسك بطنه وأقول: “يلا يا كاكا أخرجي” وكمّلها في الحمام الحمد لله.

وبعدها قبل النوم حاولت معاه وزبطت معانا شويا.

اليوم السادس:

طلب الحمّام وسوا نمبر 2 بنفسه الحمد لله، طبعًا سويت حفلة تصفيق وتشجيع 🥳👏🏻😍.

بس كان يوم شويّا متعب، ما أعرف كم مرة رحنا ورجعنا للحمام عشان يبا يسويها.. ولا يسويها 😭.

اليوم السابع:

كان يسويها شويا برا ويستوعب ويجري عالحمّام ويكملها، هنا عرفت إنه الحمد لله راح منه الخوف وصار يعرف الإحساس.

وهذا تطوّر ممتاز في تحكّمه بالعضلة ما شاء الله، بس فيه نقطة تضحّك 😅، إنه ساعات يطلب يروح الحمام ويجري “أمّام أمّام..” ولمن نوصل تطلع بس غازات 🤣.

اليوم الثامن:

خلاص ولا غلطة الحمد لله في (نمبر 2) 💃🏻👏🏻.

وبكدا خلصنا موضوع تعليم الحمّام في النهار 👌🏼😍.

أما بخصوص النوم، كل الأيام اللي فاتت ألبّس له الحفاظة وقت النوم، بعد ما ينام أو قبلها عادي.

(طبعا حسب طفلك، لو طفلك يصحى وهيا ناشفة معناته هو مستعد تفكي له هيا في الليل على طول).

ولدي لسا بياخد غفوة وحدة، ووقت الغفوة ما بيعملها، فصرت أخليه ينام بدونها، وفي الليل على حسب.. ساعات يصحى ناشفة وساعات لا.

بحثت عن كيف أبدأ أعلمه في الليل 🤔؟

حسب ما قرأت يفترض إنه من عمر 22 شهر (سنة و10 شهور) الطفل بيصحى والحفاظة ناشفة.

بس لو ما كانت ناشفة عادي لا تقلقي، اتبعي بعض الخطوات:

  1. يفضّل آخر مرة يشرب فيها السوائل تكون قبل النوم بساعتين إلى ثلاثة.
  2. دخليه الحمّام قبل النوم.
  3. بعد ما ينام بساعة، شيليه وودّيه الحمّام يسويها ورجعيه، كرّريها كمان مرة قبل ما يصحى بساعة.

هذا بيعلّم الطفل إنه عادي تقوم تروح الحمام وترجع.

في حالتي ولدي بيرضع رضاعة طبيعية، وباقي آخر رضعة اللي هيا قبل النوم. (وايوا علّمت ولدي الحمام قبل لا أفطم 😂🙊).

ما أعطيه سوائل قبل النوم، أقل شي بساعة إلى ساعتين.

قبل ما ينام أدخّله للحمام، وألبّسه بيجامته، ونروح السرير أرضعه عادي نفس روتين كل يوم.

أول يوم أخذته للحمام بعد ما نام بساعة لكن ما زبطت معانا، لأنه قعد يترنّح في الكرسي، وكان نايم بعمق 😴، ولا رضي يصحى، فرجّعته وصرت أشيّك كل ساعة هل بيجامته لسا ناشفة ولا لأ؟

بعد 4 ساعات حسّيت عدا وقت طويل، فشلته للحمام واستوعب وسواها 👏🏼، ورجعته للسرير، وكمان قبل ما يصحى بساعة شلته ووديته.

يومين وزبط معانا الموضوع الحمد لله، كانت فيه انتكاسة وحدة اللي هيا موعد صحيانه، بعدها جلست أشرح له وأفهّمه بلغة بسيطة إنه ما نسويها في السرير 🤓، نصحى نروح الحمام.

بعدها صرت أوديه الحمام مو بعد 4 ساعات لكن بعد 7-8 ساعات، ولو يبا تاني هو يصحى بنفسه ويطلب الحمّام وأوديه ونرجع، بس انتبهي لو صحي بنفسه وطلب الحمّام ضروري تسابقي الزمن وتجري سريع 😂🏃‍♀️، لأنه لو إتأخرتي حيفلتها في البدايات، بس بعد كم يوم يصير متمكّن أكثر 👍🏼. 
فيه نقطة مهمة كمان لو لاحظتي إنه الطفل صحي من وسط النوم متنكّد 😖, يتقلّب ويزنزن أو تحسيه مو مرتاح في نومته ودّيه الحمام، لأنه الأكيد إنه حشران بس مو عارف.

وبكذا الحمد لله خلصنا من موضوع الحفاظة نهار وليل 🎉🙅🏼‍♀️.

تعليم الأطفال بيختلف من طفل لآخر، لو طفلك عمره 22 شهر وأكبر وحابة تجربي جربي وأحكمي بنفسك. حتقولي طفلي ما عنده ولا علامة إستعداد! بسألك هل طفلك لو يبغى شي منك يقدر يوصّله ليكي ويحاول يفهمك إنه يبغى هذا الشي بأي طريقةٍ كانت؟ يعني مثلا يبغى شي من المطبخ، هل يسحبك للمطبخ ويحاول يوريكي ويأشّرلك؟ أو لو كان يتكلم يقولك اللي يبغاه؟ لو ايوه هذا معناته إنه طفلك يفهم ويدرك ومستعد إنه يتعلّم تخيلي!

بالإضافة إنه أغلب الأشياء في حياة الطفل بيكتسبها بالتعلّم صح؟ زي مثلاً إنه ياكل لحاله بالملعقة.

تعرفوا إنه في زمن قريب كانوا بيتعلّموا الحمّام ويتخلصوا من الحفايظ على عمر 18 شهر! وأقصى شي سنتين.

وزمان مرّة كانوا بيعلّموهم قبل لا يمشوا حتى! وايوا فيه ناس بيتخلصوا منها تمامًا على عمر 8-12 شهر.

وحاليًا في زمنّا ما بنعلّمهم إلا بعمر قريب من الـ 3-4 سنوات!

طيب بتقولوا الدراسات بتقول كذا وكذا، وأضرار نفسيّة وجسميّة للي بيتعلموا بدري، وفلان وعلان.. الخ

السؤال المهم، هل في دليل على هذا الكلام؟ لأ مافي، بالعكس بيعطيهم الإحساس بالثقة والإنجاز، وبحط لكم اقتباس من كتاب Potty train in a weekend.

Potty Training

لمن تحبّي تعلّمي طفلك لازم تكوني هادئة وصبورة 🧘🏼‍♀️، ولازم تشجّعيه، وخليكي مركّزة معاه، ولا تحكمي عالموضوع من أوّله، خليه يعدي أسبوع وبعدها أحكمي وقرّري.
لو بعد أسبوع أتقن الموضوع بنسبة 60% إلى 70% فهذا شي عظيم 👏🏼، كمّلي لا توقفي 👍🏼، حيحتاج كم يوم كمان إن شاء الله وتنهي الموضوع (غالبًا حيكون أتقنها خلاص أو أتقنها بنسبة كبيرة).

وإنتي بتعلّميه لا تسألي طفلك تبغى الحمّام؟ أو يلا نروح الحمام✋🏼، أعطيه الثّقة وقولي له: “حبيبي لو تحتاج الحمّام بلغني, لو بتعمل أوشو أو كاكا قول لي” بطريقتك بالكلام معاه وصلي له هذا المعنى.

ولا تاخذيه كل نص ساعة الحمّام، حتكرهوا الموضوع 🤦🏼‍♀️. بس ذكريه كل شويا لأنه الطفل غالبًا بينسى ويتلهي مع اللعب.

بالإضافة ممكن تلاحظي في وقت التعليم تغيّر في أوقات نمبر 2، في حال إنه يعملها في أوقات معيّنة بإنتظام، عادي لا تقلقي. هذا شيء طبيعي.

وكمان لو يناسبك تعلّميه بس في النهار، والليل تأجّليه عادي مو مشكلة، إختاري اللي يناسبك إنتي وطفلك 😊.

وفي واحد من الكتب بعنوان 3Days Potty Trainig. Start Friday, Done Sunday! بتعبّر الكاتبة حسب تجربتها، إنه عمر الـ 22 شهر هو العمر المناسب والمثالي للتعليم).
وذكرت أيضًا بإنها لو شافت علامات استعداد بعمر الـ 15 شهر فحتنتظر لعمر 22 شهر وحتبدأ تعلّمه.
(الكاتبة علّمت 5 من أطفالها بهذه الطريقة، وساعدت أكثر من 3,000 أم لتعليم أطفالهم).

بس لو حبّيتوا تجرّبوا من عمر 18-20 شهر عادي جدًا، كل أم حرّة وأدرى بطفلها ووضعها، وفيه ناس درّبوا ونجحوا.

وكل الكتابين ذكروا إنه الطفل كل ما كبر  كل ما صارت الحفاظة (عادة)، ولمن يوصل فوق السنتين والنصف، وقت تعليمهم حيكون شويا أصعب من الأصغر عمرًا، لأنهم حيقاوموا الوالدين في تغيير هذه العادة، بس إنه حتوصلهم وحيستوعبوا الفكرة أسرع من الأصغر عمرًا. (طبعًًا لكل قاعدة شواذ).

قبلها بكم يوم لازم تهيئيه.. كيف 🧐؟ بذكر لكم كم نقطة إتفقوا عليها من قراءتي وبحثي المتواضع:

  1. تعلميه أسماءهم، ولمن يعمل نمبر 2 في الحفاظة، أرميها في الكرسي وقولي يخ وأسحبي السيفون.
  2. تكرّري عليه “إننا نسويها في الحمّام”.
  3. لو عندك كتاب مثلا يحكي عن الموضوع، أشرحي له عليه، أو عندك أغاني عاليوتيوب شغليها له وأشرحيها.

بالنسبة ليا فكنت مهيئته من زمان، بس أكرّرها عليه ويعرف أسماءها، بس اللي سويته إني شغّلت له الأغنية، وشرحت له عشان يستوعب أكثر.

الأشياء اللي تحتاجيها:

  1. ضروري يكون عندك القطعة اللي تصغّر كرسي الحمّام [قاعدة حمّام] (عن نفسي ما أفضّل النونيّة اللي تجي منفصلة ويتعلّم عليها، لأني حأضطر أرجع أعلّمه عالكرسي العادي بعدها) في أنواع كثيرة إختاري منها اللي يناسبك. متوفّر في عدة أماكن: (سنتربوينت – الصيدليات – ممز وورلد – تويز ار اص..).
  2. تطبعي ورقة أو ترسمي عليها بيدك، عشان لمن يعملها تخليه يحط استكر عليها، لا تقولي “صغير ما يفهم“، كنت أحسب كدا برضو.
    أنا عملتها بعد ما أتقن نمبر 1، وطوّل في نمبر 2 فقلت بشجّعه بيها، واتوقعت ما حيستوعب الفكرة، بس إنبسط عليها مرة الحمد لله 😍، وصار لمن يسويها أخليه يحط نجمة ⭐.
    طبعًا الجود من الموجود، بما إنّنا في حجر إذا ما عندك طابعة أرسميها بيدك، وإذا ما عندك استكر نجوم أو أي شكل، عادي حطي صح بالقلم بعد ما يعملها 👍🏻.
    أنا طبعت هذه وأضفت عليها صورته على الجنب 😍. [رابط لتحميل التصميم بجودة عالية للطباعة]

     

    Potty_chart

  3. كلوت أو سروال داخلي، أنس ما كان عنده إلا واحد 😂، بس مشي الموضوع، أهم شي يستوعب الفكرة، وعادي لو ما عندك أو اتوسخ لبّسيه شورت إلين ما تشتري.
  4. فيه نقطة سويتها لو تحبّي تعمليها، رفعت السجاجيد المفروشة في البيت لأنه أكيد حنتفق إنه تنظيف السيراميك أسهل 😬.

اتحمستوا تطبقوا ولا لسا 😎؟

كل أسئلتكم مرحّب بيها طبعًا، وحأجاوب باللي أقدر عليه.. وفرحوني معاكم لو اتحمستوا وعلمتوا نونواتكم بعد قراءتكم للمقالة 🤩.

وتوتة توتة خلصت الحتوتة 🤗، والحمد لله الذي هدانا إلى هذا وما كنّا لنهتدي لولا أن هدانا الله.. فالحمد والشكر لله أولاً وأخيرًا..

6 أفكار عن “تجربتي بتعليم الحمام لطفلي خلال أسبوع (قبل السنتين)”

  1. تبارك الرحمن ماشاءالله تبارك الله??
    بجد ماقد جربت اعلمهم قبل السنتين احسه تعب لهم بما انهم صغار..
    بنتي لما صار عمرها سنتين و٤ شهور كانت مستعده تتعلم بسس انا نفسيا مستعده اعلمها فأجلتها لحد سنتين و١٠ شهور وعلمتها تقريبا اخذ الموضوع اسبوعين والحمدالله نظفنا

    1. صح حتى أنا اتوقعت بناء على اللي قرأته وكنت أسمعه إنه ماينفع, بس صراحة التجربة والكتاب اللي قرأته غيرت نظرتي تمامًا.
      فعلًا الأطفال أذكياء وبيستوعبوا كويس ماشاء الله الله يحفظهم ..
      الحمدلله خلاص ارتحتي واتخلصتي من الحفايظ ?? ?? .

  2. أنا لسه في ثاني يوم بنتي اسبوع وتكمل 3سنوات اضطريت انتظر الاجازة الصيفية بحكم عملي ثاني يوم فاهمه المفردات لكن لما تجلس ع النونية مافي شي الله ييسرها

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Scroll to Top